* نصّ البلد عسْكر على نصّها

 

ولصّها سمْسَر فى ديك أمها

 

ولأنه عايش على نشف ريقها
                                               

ح يموت عافقها من رغيف همّها

 

**

لو جنّه ؟ أهرب وأتّقى شرها

 

*

* ما هو أنت لو فرْعون وأبوك منقرع

 

زى الملوك يا تكون جبان يا جدع

 

وما كانش تاجك يبقى نكته عليك

 

ونعيش نخمّن فيك ونضرب ودع

 

**

ويقولوا ماركة لنوع جديد مُختَرع

 

*

* يا سجن يا أبو حديدة صلب وحجارة

 

يا هيلمان الكآبة سلطة وإدارة

 

من عضمى لسه طرى ما قدرت تغلبنى

 

واللى بشومك ضربنى راح فى خرارة

 

**

أكمن ذمّة ضميره يبيعها بسجارة

 

*

* فجأة ـ رجعت للزنزانة لا نفرادى

 

ما كانتش برحَة وشرحة زى الماضى

 

أصل اللى مسّخ قِرْفة الأيام

 

حسّرنى حسرةْ موت على بلادى

 

**

لما حرمنى الضحكة ويّا أولادى

 

*

* نبيل وهوَّه النبيل الأصل والإحساس

 

غنى بحب البشر . ترياق جرَاح وَنّاس

 

موصوف أمل بالشفا لليائس المهموم..

 

ضمان أمان م الهموم قلبُه وتر حسّاس

 

**

مصرى الطباع والأدب بلْسم شفاء للناس ..

 

*

* يا دى الصباح اللى بيبشرنى بهزيمته

 

صبّحنى باللى أما نمت . حلمت بجريمته

 

أفلام وأخبار جرايد كلها تأليفه ..

 

جهلُه غمَرنى بتخاريفه ـ فصدّقته

 

**

مدمن أنا؟ واللى دمّى معكّراه سيرتُه!

 

*

يعيش مبارك ألف عام

 

محمى من الموت الزؤام

 

ومن العَتَه ومن الفصام

 

من الكساح ومن الزكام
                                               

ومن الجرب ومن العجَز

 

ومن الجذام

عاش مستقيم

 

ومستديم ومستدام

فى ظل ورعاية المدام

 

لحين يرجّع للوطن

 

وجهه لأمام

يغسل له جسده
                                               

من العفونة والسخام

يوصله لمجده القديم

 

يفك عن بطنه الحزام ..

 

يعيش مبارك ألف عام

 

اشمعنى بورقيبه
                                               

وكيم إيل سونج

والمخفى فرانكو

والا أبو الهمّ وسخام

اشمعنى هوّ ؟! ـ بتنكروا فضله

على حفظ النظام

م البهدلة والحاقدين

 

والمدمنين سقط الكلام

 

من ربع قرنينْ

 

أو يزيد شغّال تمام

آمون مبارك خطوته
                                               

ومراعى زنقة أزمته ..
                                               

يحميه من السم الخفى فى لقمته

 

يرقيه من الكدب

اللى بتدسه الغباوة فى كلمته

ينْجيه من الغدْر

اللى فى عيون اللى عايزين يورثوه

ومن اللى عايزين بالحيَا

فى قلّة حياء يكفنوه

الناكرين فضل القمر

 

وبالظلام بيتهموه

العاجزين عن الغرام

وبالغوايه يظلموه

المنكرين الشمس

عاجزين م العمى أن يلمحوه

مش مدركين أنه مازال

هوّ الوحيد هو الأحد

بالعشرة عافق دفة المركب

بقوة القدر

ملئ السّمَع والشم

والذوق والبصر

ملاح فى بحر رهيب خطر

ما يدركوه

فارد شراع مصر

اللى قبله قطعوه

فلاح خطاويه ع الصحارى

ولا المطر

خضّر صحور سينا

ومارينا وتوشكا ..

ياما بالفراولة والجزر

 

وصّل لشرم الشيخ

مجارى من عسل ترعة دموه

يا خلق هووه

 

يا موتى اصحوا وحدوه ..
                                               

وادعو معايا لربنا بحق اليتامى
                                               

وبحق من فرق الحلال من الحرام

 

يفضل باروكه لمصرنا ماركة ودليل

 

زى الهرم وأبو قير

وجبل الطور ونهر النيل

ما فيش زيّه ولا غيره بديل

 

قابض ع الجمرة ما يفلتش اللجام

 

يحمى المراكب م الغرق

 

وقطورة السكة الحديد

من الحريق ومن الصدام

يرُمّ عضم المكسورين النفس

باللقمة الطرية والحمام

ويهد حيل الطماعين

ببنوك وشورى واحترام

إحنا قرَشنا ملحتُه

 

ودقنا مر قرفته

تهنا فى سراديب حكمته

وحفظنا تقاطيع طلعته

حتى آمنا من قلوبنا إنه خير من قِلّتُه

فوقوا وحسّوا يا غَجر

عجز البشر عن التمام

مع أن إنّه من خيار خير البشر

 

نَفَسُه فى نبض الأرض فى عروق الحجر

 

 يسرى بإكسير السلام

 

*

يعيش مبارك ألف عام

 

لحد ما يرتاح جميع المتعبين من التعب

يشفى جميع المرضى من الأمراض

يساراً أو يمين من الغضب

يرتب الفوضى على شرع النظام
                                               

يظبط الفلتان وينعقد الديوان

 

شى الله يا أهل الله

 

وبركة حصانته

ترجع الهربان بأموال البنوك

 

يتعلم البرسيم معاشرة الهالوك

 

يرتاح قليل الأصل

تتلضم السلوك

يُشطف تاريخ مصر الملوك

 

م الجرسة والهذيان وإدمان الشكوك
                                               

يحتاروا فيه

يتعجبوا أعاديه

ويشتوا حساده الهوام

بفضل سحر وعبقرية

القرايب والحبايب والمدام..

السهرانين يرتبوا الصدفه لأولاده وأحفاده

إلى يوم القيام
                                               

يعيش مبارك ألف عام ..

 

*

* ما عادش غير النّفاية تلغْو صوافيها
                                               

على دق طبل الختام وفيها لأخفيها

 

لكل واحد خطيّة حمْل على كتفُه

 

أعمى ومن كتر همّه

بيقرا خطه فى كفّه

إنشل جدر الشجر
                                               

الخوف رَبَك صفه

 

النيل عجوز عاجز حزين على نفسُه
                                               

والميه حتى السم مابتفوتش على عطشان !

 

....

كان حلمك إيه يا خلفة الأحزان ؟

 

ماتت ( فهيمة ) وطفلها فى بطنها
                                               

لجل الضيوف يشبعوا ويستكفو

يوم ما خرجت كسير من الزنزان

 

....

يا ريتنى قلت الشهادة
                                               

كنت أخلّص نفسى

 

خدعنى طبعى الملاوع قالها أبو العريف

 

أو قول مزاجى الشريف
                                               

ما عرفتش الأيام كورق الخريف
                                               

بتموت على غصنها حين تدبل الأحلام

 

كان لِسّه إيه فى جرابك تنسى بيه طبعك

والا تطاوع مطامعك

 

ولسّه مين من صحابك ناسى ح يطاوعك

 

الخطوة بينكم ما كانتش عمار
                                               

الغدر فرّخ طيوره جوّه حوش الدار

 

الضعف صاحب القرار

والحزن ألزم له التزام الصمت

الشعر خان الريف وبلّغ فرار

 

وأنت بخيابْته التزمت

 

لما سكرت بخمر لاستقرار

 

وفات الوقت
                                               

هبت رياح الخريف

 

هيا أشربوا من كيعانكم نخب الاستعمار

ياللى عيونكم غفولة عن ملامحها

 

من أجل الاستمرار

 

عقولكم سرق الجهل مفاتيحها

 

ماكانش عنده الحجّة يسامحها

 

على عفة الثوار من كتر فضايحها

 

على غلطة منذ البداية فايحة روايحها

 

.....

السيف على رقاب الجميع بتّار

 

مهمن يطول لانتظار

 

ما باقى غيرها النهاية

 

واضحة خوافيها فى أنياب جوارحها

 

ما فاتْش ليكو سوى نفاية

 

تلغْوصوا فيها

 

وتخلطوا حزنها برزيل تفاريحها

 

وتخربشوا للتاريخ والذكرى أساميكم

 

على اللى باقى من هديم الجوار

 

* كل يوم ترْغى كلام

 

وتعايرنا مين بيسْمع

 

طب سمِعْنا يا هُمَام

 

إيه بقْى فيه اللى ينفع

 

يا مناضل ميت لسان

 

ياللى طول اليوم بتنْخع

 

هُسّ حبّه وخُش نام

 

قبل ما ( ودانى ) تفرقع

 

اللى زيّك زيت وعام

 

وعَمل مُلسِن ومجدع
                                               

يوم ما ح يسيح اللّحام

 

هوّه أوّل من يفلْسع

 

*

* سيبْتوا الوطن يتْقل نومُه

 

وسهرتوا بتغازلو نجومه

 

ركب اللى ما يسوى ضهوركم

 

وساقكو .. عومتوا على عومه

 

*

* جرى لكو إيه يا أولاد ( بمبَة )

 

ياللى فقعتوا الخوف زومبة

 

أيام ما كان درب ( شكمبَة )

 

بيقلّع الوالى هدومه

 

*

* ياللى أسَرْتُم مرّة ( لويس )

 

وبرمْتم الأتراك قراطيس

 

وكنتو حين يحكم ( إبليس )

 

تدوّقوه لسعة سومُه

 

*

* جرى لكو إيه صيرتو تنابل

 

سايقكو على حبل شناكل

 

ساقيكم المرّ جرادل

 

تتكرّعوا فولُه وتومُه

 

*

* فين الكرامة يا قُصر الملّ

 

قيمتكو يوم عن يوم بتْقل

 

والمخ بقى محتاج مَنافل

 

بيْذِل يعزف تقاسيمُه

 

*

* خمْسين سنة طاعة بإخلاص

 

لكل ناقص دين خباص

 

نفاكو برّة العصر خلاص

 

أسرى تفاهة مفاهيمُه

 

*

ح تروحوا فين هذا قدركم

 

ما دم رضيتوا يوْرثكم ..

 

بقى حقّه لابنه يَورِّثكم

 

وكل شعب بمهازيُمه ..

 

*

* إنتو ارتضيتو الجهل قانون

 

تتدّحرجوا على بعض لمون

 

خَلَف سَلَف مكروب مطحون

 

لا يقين قوى ع الواد ميمو

 

*

* ومعسّلَة قوى يا بطاطا

 

الحكم محتاج لقلاطة
                                               

وطناش سياسة وعباطة

 

جديدُه يشفَع له قديمُة!
                                               

*

* قال لك إيه؟ قلت له آه

 

هيكل قال والحق معاه

 

كل تاريخ الناس انتيكة

 

مين زيّى الدفتر ويّاه

 

اللى بتكسب به ألعب به

 

وأمشى بالأستيكة وراه

 

دايماً فيه غلطةْ بولتيكا

 

الشاطر يبرُمها معاه

 

مين فاكر أو مين بيذاكر

 

دانت عشاك تصبح تنساه

 

كنا زمان صحفيّة تسوّل

 

لكن أمرا ما شاء الله

 

مين فى الزحمة يوصل أوّل
                                               

حظى ضرب أنا نلت رضاه

 

صرت أمين أسرار الوالى

 

على كيفى أبرطع فى حماه

 

بشطارتى ظبّطت له موجته
                                               

لو سكنّى أصرخ الله

 

بمزاجنا كتبنا على كيفه
                                               

وياما شطبنا اللى كتبناه

 

ع الشعرة نحفّف له حواجبه

 

بالذرة نجهزله غداه

 

مْلك يمينُه لما يأشرّ

 

ملَك شماله لو قال .. حاه

 

لو يغضب طرقعنا صوابه

 

وإذا يرضى لبينا نداه

 

يوم يزعل كنا نعيط له

 

وإن زرجن طيرْنا فى سماه

 

لكن لماّ الزمن أتغيّر

 

وركب ( ضلّه ) رقصنا معاه ! ..

 

* يا بتوع سياسات مصر المستقبل

 

أنا مصر الماضى ..

 

رغم الحال الحالى اللى بيقهرنى

 

ورأس المال اللى غرضه يكسرنى

 

ويحسّرنى على عمرى اللى غصبن عنى

 

سرقوه منى

 

أنا متوازن راضى ..
                                               

منكم مين ح يزمّ شفايفه

 

من قرفه

 

ويقول عنى أهبل وجبلّة

 

ومنكم مين راح يتذكر لى

 

أو ح يفكر لى

 

فى هتيكة أو ذلّة ..

 

أو يتهمنى بعلة ..

 

هذا شئ عادى

حتى لو قلتو معادى

ح أسمع شتمتى بوْ دانى
                                               

وأنا هادى

 

علشان إحنا وصلنا لعصر التحليل التخمين

 

والقلب المانفلّة

 

والعقل الميلامين

 

اللى بيتنفس فيه الصفوة المساكين

 

ربْو ثقافة التلسين

 

عايشين على هبو نميمة الشلّة

 

بيميّسوا على بعضيهم وعليّه بالمخ الفاضى